चित्रकार कवी दिनेश चव्हाण यांचे तिहेरी यश एकाच दिवशी तीन साहित्य सन्मान
चाळीसगाव, 19: येथील चित्रकार, कवी, आणि साहित्यिक दिनेश चव्हाण यांनी एकाच दिवशी तिहेरी यश संपादन करून खान्देशाच्या साहित्य क्षेत्रात आपली स्वतंत्र छाप उमटवली आहे.
जामनेर येथे आयोजित 15 व्या खान्देशस्तरीय मराठी साहित्य संमेलनात त्यांच्या ‘बोल हे अंतरीचे’ या वैचारिक लेखसंग्रहाला उत्कृष्ठ साहित्यकृती पुरस्काराने गौरविण्यात आले. त्याच संमेलनात जामनेर तालुका साहित्य संस्कृती मंडळाने घेतलेल्या काव्यस्पर्धेत त्यांच्या ‘धनधान्याची खाण’ या कवितेस सन्मानित करण्यात आले. या दोन्ही पुरस्कारांचे वितरण कवी डी. डी. पाटील, कवी अशोक कौतिक कोळी, कवी प्राचार्य विश्वास पडोळसे यांच्या हस्ते झाले.
तिसरा सन्मान जळगाव येथे अभियंता भवनात संपन्न झालेल्या 22 व्या राज्यस्तरीय सूर्योदय मराठी साहित्य संमेलनात मिळाला. त्यांच्या ‘अधोरेखित’ काव्यसंग्रहाला विभावना पुरस्काराने सन्मानित करण्यात आले. हा सन्मान प्राचार्य डॉ. संजीव गिरासे, प्रा. डॉ. तुषार चांदवडकर, प्रा. सुमनताई मुठे, आणि सतिशजी जैन यांच्या हस्ते प्रदान करण्यात आला.
एकाच दिवशी मिळालेल्या या तिहेरी यशामुळे दिनेश चव्हाण यांचे सर्व स्तरांतून अभिनंदन होत आहे. त्यांच्या यशामुळे खान्देशच्या साहित्य क्षेत्रात नवीन उभारी येण्याची अपेक्षा आहे.