राम नाम सत्य आहे

राम नाम सत्य आहे

अधराचा उंबरठा, रामनाम ओलांडतो
श्रवणाने चिंतनाने भक्तीभाव ओसंडतो llधृll

राम दर्शनाने लाभे, सुख शांति समाधान
हरे राम आळविता हरपते देहभान
दुःख आत्मक्शेषासवे, वनवास आठवतो ll१ll

दोन शब्दात साठली, अलौकिक बुद्धिमत्ता
जग आजही गिरवी, राम नामाचाच कित्ता
सार रामाच्या नामाचा, सान थोराआना कळतो !!२ll

मात-पिता मानी श्रेष्ठ, जपी बंधूभाव राम
साधू-संत मुनीजन, त्यांच्या ठायी चारी धाम
दिशादिशातून ध्वनि, राम नामाचा घुमतो ll३ll

मनी भाव विनयाचा, नाही गर्व अभिमान
सूर्यवंशी प्रभूराम, सोडीचना स्वाभिमान
बाणा रामाचा करारी, अंतरंगी संचरतो ll४ll

जात-पात प्राणीजात, सारे मानले समान
बंधू लक्ष्मणासमान, रामभक्त हनुमान
लंका करुनी दहन, हाहाःकार माजवितो ll५ll

एकपत्नीव्रती तसा, राम सालस दयाळू
भिल्ल, गिद्द, वानरांचा, पाठीराखा कणवाळू
उष्टी बोरे शबरीची मान सन्माने चाखतो ll६ll

वधुनिया रावणाला, बंधमुक्त केली सीता
न्यायप्रिय बिभिषण, त्यास सोपविली सत्ता ll७ll

राम सत्याचा पुजारी, खरा धर्मपरायण
चित्त ठेवाया प्रसन्न, नित्य वाचा रामायण
लव-कुशाला बघून, राम राजा धन्य होतो ll८ll

जन्म मरणाचा फेरा, नाही चुकला कुणाला
राम नाम सत्य आहे, तथ्य कळते जगाला
मरा मरा बोलतना, राम जिभेवरी येतो ll९ll

शिवाजी साळुंके,’किरण’
चाळीसगाव, जि.जळगाव.